Saturday, December 29, 2012
മുത്തുച്ചിപ്പി പറഞ്ഞത്
എന്റെയുള്ളു പിളർന്ന്-
നീയെടുത്ത മുത്ത്,
നിന്നെ കൊതിപ്പിക്കുന്നത്;
അതുരുവായ കഥ-
നിനക്കറിയുമോ?
ഹൃദയത്തിന്റെ മൃദുലതയിൽ,
പുറത്തെടുക്കാനാവാതെ-
കടന്നു പറ്റിയ കരടിന്,
എത്ര മാത്രം നോവിക്കാമെന്ന്-
നിനക്കറിയുമോ?
എടുത്തു കൊള്ളുക;
അഴകിന്റെയുറയിട്ട-
എന്റെയാത്മ വ്യഥകളെ.........
നിന്റെ നെടുവീർപ്പിന്റെയർത്ഥം-
ഇപ്പോഴെനിക്കറിയാം.....
കാത്തിരിക്കുക....
നോവുറഞ്ഞൊരു മുത്താകും വരെ....
കണ്ണീരുണങ്ങിയൊരു ചിരിയുണരും വരെ......
Wednesday, December 12, 2012
അമ്മയാകാശം
രാവിന്റെ മടിയിലൊരു-
തിങ്കൾക്കിടാവ്;
പാൽനുര പോലെ-
നറു നിലാവ്.....
എന്റെ മടിയിലുണ്ട്-
പുഞ്ചിരിയിൽ-
നിലാവൊഴുകുമൊരു-
പൂർണ്ണചന്ദ്രൻ...!
കളങ്കമില്ലാത്തൊ-
രെന്റെ സ്വന്തം
പൊന്നമ്പിളി......!
Saturday, November 10, 2012
പണ്ടു പണ്ടൊരു പുഴയുണ്ടായിരുന്നു
പണ്ടു പണ്ടിവിടെയൊരു
പുഴയുണ്ടായിരുന്നു;
ഉള്ളിലെയിരുള് മേഘം
മിഴിയിറമ്പില് പെയ്ത്,
കവിളിണകളിലൂടെ-
ചാലിട്ടൊഴുകിയ പുഴ…
നിലയല്ലാത്താഴത്തി-
ലാര്ത്തലച്ചൊഴുകി-
വെയില് പോലൊരു വിരല് വന്നു-
തുടച്ചൊപ്പും വരെ…..
ആരു പറയുമിപ്പോള്
പണ്ടെങ്ങാനിവിടെയൊരു-
പുഴയുണ്ടായിരുന്നെന്ന്….!!!!!
പക്ഷേ പറയൂ….
ആര്ക്കെങ്കിലുമറിയുമോ
പുഴ വരണ്ട വഴിയാകെ
ചെന്താമരപ്പൂവുകള്
നിറയെ പൂത്തതെങ്ങനെ…..?
Subscribe to:
Posts (Atom)